「生仔10級痛」，冇錯，自然分娩嘅女性的確比男性更強更勇敢，「生仔咁痛都頂到，仲有咩頂唔到？」一定係所有順產媽媽引以為傲嘅口頭禪。
不過，有冇方法可以冇咁痛？
孕期內保持運動
唔好以為有左BB就唔可以做運動，事實上，適當嘅運動反而有助減輕懷孕期嘅不適，仲可以有助順產架！
凱格爾運動 (忍尿動作)
肛門用力夾緊幾秒再放鬆，重覆做。呢個簡單動作隨時隨地、任何時間都可以做，有效收緊盤底肌肉，冇咁容易發生滲尿失禁，好有用架！
瑜伽
孕婦瑜伽可以提高身體整體靈活性，增強盆底肌，對順利生產好有用。
不過，孕婦瑜伽唔同普通瑜伽動作架，一定要有專業導師指導，先至可以安全又有效咁為生產做好準備。
待產多D走動
待產嘅時候多D走動，可以令子宮頸軟化，幫助宮口打開得快D，咁陣痛嘅時間咪會短D囉！而且行吓可以分散注意力，準媽媽就唔覺得咁痛嘞。
拉梅茲呼吸法
呢種「孕婦必學生產減痛法」係通過訓練神經肌肉控制、體操同呼吸技巧，令媽咪喺生產時將注意力集中喺呼吸控制，轉移注意力，放鬆肌肉，加快生產。
放鬆、減壓
越近產期，準媽咪就越應該放鬆心情，聽吓音樂睇吓書，保持心境平靜。
另外，盡早預備好BB出世後同埋媽咪坐月嘅照顧安排，都可以令準媽咪安心，減輕壓力。
減痛分娩
減痛分娩針可以減輕痛楚，不過唔係人人適合，而且要等子宮頸開到約3公分先可以打針，太早打反而會阻延生產。
準爸爸陪產
準爸爸要上堂了解生產過程，以免入到產房被嚇暈；亦要陪太太練習呼吸法，臨場指導正確呼吸。老公不停打氣、抹汗、按摩，呢類貼心小動作對準媽媽就係最大嘅鼓勵，但各位老公要做好事前準備，避免越幫越忙。
