踏入30，雖然你心態仍然年輕，體態依舊fit爆，但其實 …… 身體機能已經進入倒退期 …… (嚇到吃手手！) 雖然一般人每年都會驗三高，但婦檢就好多人都抱睇牙醫嘅心態，怕尷尬，避得就避。但係要避免突如其來嘅 surprise，定期婦檢不能少！
冇病都要做婦檢？
就係冇有病先要做「檢查」！
原來做子宮頸細胞抹片，係最有效預防癌症嘅篩檢，萬一發生病變都可以及早發現，盡早治療，所謂「病向淺中醫」嘛 。
婦檢要做咩？
除左子宮頸細胞抹片，醫生會按吓你個肚肚，睇吓子宮同卵巢有冇腫塊；亦會按埋乳房 (呢part 好重要) check吓有冇硬塊。
我要唔要做婦檢？
• 25歲以上又有性行為，就要定期檢查，一直到65歲。
• 25歲但未有性行為，就可到有性行為先檢查，因為患子宮頸癌嘅風險比較低。
• 如果從來都冇性行為或者已經切除全子宮，切除前又冇病變，就唔需要做細胞抹片。
• 為穩陣起見，過左40就最好每兩年做吓乳房X光造影喇。
• 假如你家人有家族病、乳房病或者病變，就更應該提早開始婦檢。
我未結婚又好後生喎！
好多年輕女生以為「婦科病」只會發生喺已婚、生左BB或者年紀大少少嘅姐姐姨姨身上，其實即使20+，甚至係青春期嘅妹妹仔，同樣可能會有婦科煩惱架。
好多女生都會M痛到典床典蓆，或者尿頻、小便赤痛、有唔正常分泌物，其實都可能係陰道有細菌感染呀。
所以呢，每年定期做婦檢，就可以確保自己健健康康，就算萬一有毛病都可以小事化無啦。
