fbpx

邊D維他命對準媽咪同BB最好?

準媽咪當然好緊張BB嘅成長,時刻確保佢地有足夠營養,由於擔心就算自己均衡飲食都唔夠,所以大部份媽媽都會食補充劑 (supplement),但係究竟邊種維他命對BB先係最有益?

葉酸 – BB腦部發展好
葉酸唔單只可以幫助胎兒中樞神經發育,減低出現先天腦部或脊椎發育異常嘅機會,連媽媽都可以避免貧血架。

好多媽咪以為12週後就唔再需要補充葉酸,事實上,準備懷孕就已經可以補葉酸架喇,亦唔需要介意幾時開始或停止補充,其實葉酸對黏膜細胞嘅新陳代謝、心血管健康都好有益,有研究甚至話可以防禿頭,所以根本一生人都可以補充葉酸。

準媽咪可以食多D深綠色葉嘅菜、豆、水果,有D麥片都有加左葉酸架。

另外,葉酸都負責造紅血球,所以貧血就更需要額外補充葉酸嘞。

維他命B3–BB媽咪同樣受益
澳洲有研究話,如果缺乏維他命B3,發生流產同畸胎嘅機率會高好多!所以必須注意補充,而且早喺打算要BB嘅時候已經可以開始食B群 (B Complex) 攝取維他命B3。到懷孕嘅時候,B群就可以保持新陳代謝正常,令皮膚、心臟、神經系統、黏膜同消化系統都健康D,準媽媽仲會冇咁易攰同埋減輕作嘔作悶唔舒服添。

維他命D3–防止胎兒發展遲緩
補充維他命D3嘅方法係曬太陽,但女士最驚曬黑,陰天都要搽防曬,所以都係靠補充劑幫手啦。

如果缺乏維他命D3,胎兒可能會發育遲滯,後果好嚴重架。至於幾時補充維他命D3對胎兒最重要?其實任何階段補充都可以,醫生通常會建議等懷孕12週穩定後,再補充最好,然後可以持續補充,直至BB出世。

另外,鈣同維他命D3可以一齊被吸收,相輔相成:維他命D3對胎兒智能發育有幫助,鈣就有助長骨骼成長,而通常懷孕喺後期對呢D需求比較高,所以會歸類為後期補充劑。

講到尾,準媽咪最重要都係均衡營養,充足休息,放鬆心情,BB就一定肥肥白白喇。

發佈留言

發佈留言必須填寫的電子郵件地址不會公開。 必填欄位標示為 *